რა დაგჭირდებათ საზღვარგარეთ ცხოველის წასაყვანად
March 29, 2017 18:27 Nika Gigashvili
თუ თქვენი ოთხფეხა მეგობრის საზღვარგარეთ წაყვანა გსურთ, გირჩევთ წინასწარ დაიჭიროთ თადარიგი. აუცილებლად დაგჭირდებათ ცხოველის პასპორტი, სადაც მითითებული იქნება ჩატარებული აცრების თუ სხვა პროცედურების (დეჰელმენთიზაცია, რწყილებზე დამუშავება და სხვ.) შესახებ ინფორმაცია. ცოფის ვაქცინაცია ჩატარებული უნდა იყოს მინიმუმ 1 თვით ადრე. აუცებელია, ასევე ცხოველის ჩიპირება ან ტატუირება. საზღვარგარეთ წასაყვანად დაგჭირდებათ ნებართვა (ვეტერინარული სერტიფიკატი) სსიპ სურსათის ეროვნული სააგენტოს ვეტერინარული დეპარტამენტიდან. ნებართვისთვის ადგილზე წერთ განცხადებას და იხდით 50 ლარიან ქვითარს. თან უნდა იქონიოთ ცხოველის პასპორტი, თქვენი პირადობის დამადასტურებელი საბუთი და ასევე, ცხოველის ჯანმრთელობის ცნობა (თუკი საჭიროა ქვეყნის მიხედვით) . გაითვალისწინეთ, რომ ვეტერინარული სერთიფიკატის აღებიდან მაქსიმუმ 72 საათის განმავლობაში უნდა დატოვოთ ქვეყანა. ახალი ნებართვის გაკეთება არ დაგჭირდებათ თუ 90 დღის განმავლობაში უკან დაბრუნდებით საქართველოში.
სსიპ სურსათის ეროვნული სააგენტოს მისამართია ქ. თბილისი, მარშალ გელოვანის გამზირი #6; ტელეფონი: + 995(32) 291 91 68
პოსტსაბჭოთა ქვეყნებში ითხოველ ცხოველის ჯანმრთელობის შესახებ ცნობას , ე.წ. კარანტინის ცნობას, რომელსაც ნებისმიერ ვეტერინარულ კლინიკაში აიღებთ. ევროკავშირის ქვეყნებში კი ითხოვენ “ლიმბახის” ცნობას, სადაც მითითებული იქნება რამდენად აქვს ცხოველს გამომუშავებული იმუნიტეტი ცოფის მიმართ. კონკრეტულ ქვეყნებში შესაძლოა სხვადასხვა მოთხოვნები იყოს, ამიტომ თავის დაზღვევის მიზნით გადაამოწმეთ ინფორმაცია შესაბამისი ქვეყნის საკონსულოში.
ტრანსპორტირებისთვის დაგჭირდებათ ცხოველის გადამყვანი კონტეინერი და ბილეთი. ზუსტად უნდა გაარკვიოთ თქვენს სატრანსპორტო კომპანიასთან თუ ავიახაზებთან რა მოთხოვნები აქვთ, რადგან მათი პირობები ხშირად განსხვავებულია. გასათვალისწინებელი იქნება ცხოველის წონა, გადამყვანი კონტეინერის ზომები. დიდი ზომის ცხოველის გადაყვანა უმეტესად საბარგულით ხდება, ხოლო მცირე ზომის ძაღლებისა და კატების გადაყვანა სალონითაც არის შესაძლებელი.
და ბოლოს, გაიარეთ კონსულტაცია თქვენს ვეტერინართან იმის თაობაზე თუ როგორ მოამზადოთ ცხოველი მოგზაურობისთვის.